F’dak iż-żmien, Ġwanni kien hemm ma’ tnejn mid-dixxipli tiegħu. Ħares lejn Ġesù li kien għaddej minn hemm, u qal: “Araw il-Ħaruf ta’ Alla”. Iż-żewġ dixxipli semgħuh jgħid dan, u marru wara Ġesù.
Ġesù dar u rahom mexjin warajh, u qalilhom: “Xi tridu?”. Iżda huma staqsewh: “Rabbi” – li tfisser, Mgħallem – “fejn toqgħod?”. Hu weġibhom: “Ejjew u taraw”. U marru miegħu u raw fejn kien joqgħod, u dakinhar baqgħu miegħu. Kien ħabta tal-erbgħa ta’ waranofsinhar.
Wieħed mit-tnejn li semgħu x’kien qal Ġwanni u marru wara Ġesù kien Indrì, ħu Xmun Pietru. L-ewwel ma għamel mar isib lil ħuh Xmun, u qallu: “Sibna l-Messija” – li tfisser Kristu. U ħadu għand Ġesù. Ġesù ħares lejh u qallu: “Inti Xmun, bin Ġwanni. Inti tissejjaħ Kefa” – jew Pietru.
Il-Kelma tal-Mulej.
San Ġwann, f’kap 1, jirrakonta l-ġrajjiet li seħħew fl-ewwel ġimgħa tal-ministeru ta’ Ġesu’. Dil-ġimgħa tibda bil-magħmudija ta’ Ġesu u tispiċċa bit-tieġ ta’ Kana. Illum qed jgħidilna fuq it-tielet jum.
Ġesu’ kien għaddej qrib ix-xmara, il-Battista lemħu u qal lil tnejn mid-dixxipli tiegħu: “Hekk hu l-Ħaruf t’Alla,” għax mhux biss ħares lejh imma għaraf (emblempo = tara x’hemm ġewwa) tassew min kien, x’kienet l-identita’ profonda tiegħu.
Ir-riżultat ta’ din is-sejba kien li l-Battista sar appostlu ta’ Ġesu’. Anki llum, kull min jiskopri lil Ġesu’, u jieħu ż-żmien tiegħu biex isir jafu intimament, isir appostlu tiegħu. Bħal meta ġuvni jieħu grazzja ma’ tfajla u jistqarr il-famuża “love at first sight”. Imma mbagħad iridu jieħdu ftit taż-żmien biex isiru jafu ‘l xulxin sew.
Il-Battista, wieqaf, jara lil Ġesu’ għaddej, u jirrejalizza li l-missjoni tiegħu waslet fit-tmiem. Lest biex jagħti l-‘hand over” lil Ġesu’. Permezz tad-demm tal-ħaruf, il-poplu Lhudi ħeles mill-jasar tal-Eġittu.
Permezz tad-demm tal-Ħaruf t’Alla, il-bnedmin kollha se jinħelsu mill-jasar tad-dnub. Dan il-Ħaruf ġie mibgħut mill-Missier Etern f’dinja ta’ lpup. Imma s-salib kien l-unika mod biex il-Missier juri l-imħabba kbira li għandu għall-bniedem, u biex jurih li, biex il-bniedem jgħix ħajja umana awtentika, irid jimxi fuq il-passi tal-Ħaruf, li jagħti ħajtu għas-servizz u l-imħabba tal-oħrajn.
Dan ried ifisser il-Battista meta qal: “Dan hu li jneħħi d-dnub tad-dinja.” Dan hu d-dnub ta’ dawk li jgħixu ħajja ta’ lpup. Il-Battista żgur li ftakar fis-siltiet minn Isaija: “Bħal ħaruf meħud għall-qatla”, biex iġib fit-tmiem ir-renju tal-ilpup, poter, u egoiżmu, u tibda s-saltna tal-imħabba u ta’ servizz għall-oħrajn, u b’hekk “il-lupu jibda jgħix mal-ħaruf.” (Isaija).
Żewġ dixxipli tal-Battista semgħuh jgħid x’qal dwar Ġesu’, u telqu warajh. Biex wieħed jiddeċiedi li jgħix ta’ ħaruf f’dinja ta’ lpup kienet ħaġa ta’ riskju kbir.
“Marru u raw fejn kien jgħammar, u dak in-nhar baqgħu miegħu.” Il-Battista, bħall-profeti ta’ qablu, ma felaħx aktar għall-imġieba qarrieqa u giddieba tal-poplu, l-aktar tal-mexxejja. Ma kienx jibża’ jgħid il-verita’, bħal fil-każ tal-mara ta’ Erodi.
Kien jittama għall-bidla fil-qlub tal-bnedmin. Id-dixxipli tiegħu iddakkru minn dan l-ispirtu u entużjażmu. Issa li l-Battista indikalhom Mgħallem ġdid, marru miegħu.
Jekk aħna rridu nindikaw lil Ġesu’ lill-oħrajn, jiħtieġ nisħqu fuq il-bżonn li hawn fid-dinja li jonqos u jinqered l-egoiżmu u l-materjaliżmu, u nitħabtu biex tikber l-imħabba tal-proxxmu. Eżempju: żagħżugħ jifhem kemm il-bniedem jonqsu mħabba sinċiera u disinteressata, żgur li jagħmel għażliet għaqlin u umani.
“Xi tridu? X’qegħdin tfittxu?” Dawn huma l-ewwel kelmiet li lissen Ġesu’ fil-Vanġelu skont S. Ġwann. Tajjeb li aħna nsaqsu: “X’qed infittex jien meta nimxi wara Ġesu’? Is-suċċess? Li bit-talb ta’ spiss ikolli ħajja komda, mimlija privileġġi, u bla nkwiet?”
Għax anki Erodi fittex lil Ġesu’ biex joqgħod jagħmel il-mirakli quddiemu. Jien hekk ukoll? Spiss nisimgħu lil xi ħadd jgħid: “Tlabt grazzja imma ma qlajthiex! Mela għalfejn qiegħed Alla u l-Knisja?” Jekk nimxu wara Ġesu’ għal dawn ir-raġunijiet se nibqgħu delużi.
Meta Ġesu’ jistaqsi “Xi tridu?” irid ifisser “Fhimtu sew x’inhi l-missjoni tiegħi? Taf għal x’hiex deħlin? Irridu nirbħu lil did-dinja tal-annimali salvaġġi mhux bil-vjolenza imma bil-manswetudni ta’ ħaruf.”
Id-dixxipli tal-Battista jirrispondu b’domanda: “Fejn tgħammar, Rabbi?” Mhux qed isaqsuh l-indirizz għax, kif nafu, bin il-bniedem ma kellux saqaf fuq rasu. Mela li riedu jgħidulu hu: “Aħna rridu noqogħdu miegħek, tmur fejn tmur. Irridu nsiru nafuk sew, irridu ninagħqdu miegħek. Irridu ngħixu mal-Ħaruf u bħal Ħaruf.”
“Ejjew u taraw,” tfisser: ejjew ħa taraw id-dawl li se jkeċċi d-dlamijiet li ħakmu l-art.” Noqogħdu attenti biex aħna wkoll, wara li nieħdu risposta u nvit minn għand Ġesu’ għal xi domanda li nagħmlulu, nieħdu deċiżjoni biex nimxu warajh aktar mill-qrib, u mhux nibqgħu staġnati fejn konna qabel.
Id-dixxipli “baqgħu miegħu il-jum kollu,” - ma reġgħux lura d-dar għall-ħajja l-antika.
“L-erbgħa ta’ wara nofs in-nhar.” Tfisser:
(a) it-tmiem tal-jum huwa fil-qrib, u se jqum jum ġdid li jagħti bidu għal dinja ġdida. Meta ngħidu li bniedem ra d-dawl infissru li twieled. Dawn id-dixxipli twieldu għal dan il-jum ġdid;
(b) tant kienet esperjenza qawwija li baqgħu jiftakru l-ħin eżatt meta ġrat. Is-silta tal-lum tistedinna biex aħna nagħmlu esperjenza bħal din. In fatti, għalihom din tant kienet esperjenza qawwija li ma felħux iżommuha għalihom biss. Riedu jaqsmuha m’oħrajn.
Marru jiġru lejn id-dar: “Sibna l-Messija, dak li se jagħti bidu għal umanita’ ġdida.” Aħna wkoll jiħtiġilna nipproponu dil-proposta għal dinja ġdida lill-oħrajn, l-aktar liż-żgħażagħ.
Indri’ jieħu lil ħuh għand Ġesu’, li malli rah semmieh “Kefa”, blata, għax din se ttih l-identita’ tax-xogħol li se jiżvolġi fil-bini ta’ din id-dinja l-ġdida. Is-skiet ta’ Pietru juri li aċċetta din is-sejħa bla tlaqlieq.
Id-dixxiplu l-ieħor hu bla isem. Din insibuha xi sitt darbiet oħra (e.g. Emmaws). Dan għaliex l-Evanġelista jistieden lilek u lili biex inkunu dak id-dixxiplu.
Eżatt qabel it-Tqarbin imqaddes, nerġgħu intennu: “Dan hu l-Ħaruf t’Alla li jaħfer id-dnub tad-dinja” għax permezz tat-Tqarbin aħna mhux biss nitqarrbu lejn Kristu iżda nitwaħħdu miegħu, għax mingħajru aħna ma nistgħu nagħmlu xejn.
No comments:
Post a Comment